DIGITEC EXPO – ի կրթահամալիրի տաղավարում այսօր մենք ենք` տասներկուերորդ դասարանցիներս: Լիովին պատրաստ ենք ներկայացնելու մեր կրթահամալիրը: Անմիջապես կատարեցինք աշխատանքի բաժանում, և ամեն մեկը սկսեց զբաղվել իր գործով:
Այստեղ յուրօրինակ աշխուժություն է տիրում: Եռուզեռը մեծ է հատկապես այն տաղավարների մոտ, որոնք ներկայացնում են լազերային և այլ էլեկտրոնային խաղեր: Իմիջիայլոց, մենք էլ չդիմացանք գայթակղությանը և մանկացանք մի պահ` չմոռանալով, որ լրագրող ենք:
Նկատեցինք, որ այս տարի ավելացել է այն տաղավարների թիվը, որոնք ներկայացնում են կրթական ծրագրեր: Ինչպես միշտ, մեր կրթահամալիրը ներկայացնող տաղավարի մոտ հետաքրքրվողների մեծ բազմություն կար: Թադևոսն ու Զարուհին ցույց էին տալիս էլեկտրոնային գրիչների առավելությունը, ներկայացնում կրթահամալիրը, «Նեթբուքն ինձ դասընկեր» ծրագիրը: Շատ-շատերը փորձում էին, զարմանում ու հիանում թե′ մեր ծրագրերով, թե′ մեր երեխաներով, որոնցից ամեն մեկը, համակարգչի առջև նստած, իր աշխատանքն էր կատարում: Վաղը դեռ առջևում է, իսկ այսօր արդեն կամաց-կամաց պակասում է ցուցահանդեսի այցելուների բազմությունը: Սպասե´ք մեր աշխատանքային խմբի մնացած աշխատանքներին:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` info@mskh.am
