Առողջապահական կրթում

Առողջապահական կրթում

Doctor բառը ծագում է լատիներեն docere բառից, որը նշանակում է սովորեցնել:

   Առողջապահական  ուսուցման  նպատակն  է  նպաստել  անհատի  առողջության պահպանմանը,  ամրապնդմանը  և  կյանքի  որակի  բարձրացմանը՝  սովորեցնելով նրան  իր  ապրելակերպի  փոփոխման  միջոցով  կանխարգելել  հիվանդություններն  ու  վնասվածքները,  կառավարել  հիվանդությունների  ընթացքը՝ հատկապես  քրոնիկական,  և  դրական  ներգործել շրջակա  միջավայրի  վրա:

                                                                  Գլխացավ

   Գլխացավը հաճախ հանդիպող ախտաբանական վիճակ է: Գոյություն ունեն գլխացավի տարբեր ձևեր՝ միգրեն, լարվածության, քթի հարակից ծոցերի, տեղային:

   Գլխացավի առաջացման առավել հաճախ հանդիպող պատճառներից են՝ 

• հիվանդությունները՝ ինչպես օրինակ  սուր շնչական վարակները, սինուսիտները, ականջի բորբոքումը
• վնասվածքները ՝գլխուղեղի ցնցում
• սթրեսը, ընկճվածութունը
• անքնությունը
• ալկոհոլի օգտագործումը
• քաղցածությունը
• ծխելը, պասիվ ծխելը
• աղմուկը
• եղանակի փոփոխությունը և այլն:

   Միգրենը  միակողմանի  գլխացավն է:  Առավել  հաճախ  հանդիպում  է  կանանց  մոտ: Հիվանդության  պատճառը  կապում  են  որոշ  հորմոնների  և  քիմիական  նյութերի  փոխանակության  խանգարման   հետ:  Հիվանդության  զարգացման  գործում  մեծ  դեր  է  խաղում  նաև  ժառանգական  գործոնը:

   Միգրենը  դրսևորվում  է  

• սաստիկ գլխացավով, հատկապես ճակատի,  քունքի և ակնակապիճի շրջանում՝ աջից կամ ձախից
• սրտխառնոցով
• փսխումով
• վառ լույսի ու բարձր ձայնի նկատմամբ արտահայտված զգայունությամբ:

   Կարող  է  շարունակվել  մի  քանի  ժամից  մինչև  մի  քանի  օր:  Գլխացավի  նոպային  կարող  է  նախորդել  աուրան,  որի  դեպքում  լինում  է

• տեսողության  խանգարում՝  փառ  աչքերի  առաջ
• տեսողական  դաշտերի  նեղացում
• երկտեսություն
• գլխապտույտ
• ծակծկոցներ  վերջույթներում,  դեմքի,  լեզվի շրջանում
• խոսքի  դժվարացում:

   Գլխացավերի  կանխարգելման  նպատակով

• բավարար  ժամանակ  հատկացրեք  քնելու  համար
• խուսափեք  այնպիսի  սննդամթերքներից,  ինչպիսիք  են  պանիրը, շոկոլադը,  կակաոն, ընկույզը,  ապխտած  սննդամթերքը,  ինչպես  նաև  շամպայնը  և  գինին
• դադարեցրեք  ծխելը
• կանոնավորեք  Ձեր  ֆիզիկական  և  մտավոր  ծանրաբեռնվածությունը
• սնվեք  օրվա  ընթացքում  3-4  անգամ  և  ընդունեք  լիարժեք  սնունդ՝ հարուստ  մրգերով  ու  բանջարեղենով
• խուսափեք  նստակյաց  ապրելակերպից  և  հաճախ զբոսնեք  մաքուր  օդում
• կառավարեք  լարված  սթրեսային   իրավիճակները: