2013թ հուլիսի 8-10-ը Ծաղկաձորում տեղի ունեցած Արվեստի եռօրյա ակադեմիայի ժամանակ Արամ Պաչյանի պատրաստած խոսքը երիտասարդ գրողների համար:
Գրելու մասին բոլոր խորհուրդները գործնականում դատապարտված են, գուցե այն պատճառով, որ դրանք գրականություն դառնալու հավակնություն ունեն: Այն բոլոր ցուցակներ, կետերը, պարբերություններն ու նախադասությունները, որոնք բևեռված են գրելու արվեստին, թվում է` շտապօգնության անվճար ծառայություններ են, ինքնակենսագրական խոկումներ, գեղարվեստելու միջանկյալ մի պատմություն: Առաջարկելով` հեղինակը կասկածի տակ է առնում իր իսկ խորհուրդը: Դրանք նման են ճանապարհորդի նոթատետրում արված գրառումների, որոնք պետք են գալիս հետո, երբ նա, տուն դառնալով, նստում է սեղանի մոտ վերականգնելու իր անցած ուղին: