Լրացուցիչ կրթության ճամբարի նոր փուլ, նորացված կազմակերպում

Սուրհանդակ կրթահամալիրի տնօրենի բլոգից

Օգոստոսի 1-ին մեկնարկում է լրացուցիչ կրթության ամառային ճամբարների 8-րդ փուլը։

Ես այսօր նայեցի ճամբարների` հրապարակված ծրագրերը, ճամբարի կազմակերպման կարգը։ Հաշվի առնելով լրացուցիչ կրթության ճամբարի կարևորությունը, հունիսի 13-ից կուտակված փորձը, հանրակրթության կազմակերպման մեջ ճամբարի ձեռքբերումների ներդրման պահանջը, անհրաժեշտ եմ համարում առաջիկա փուլում ճամբարը ամբողջությամբ կարգին համապատասխանեցնելը։

Կարգի իրականացման-կազմակերպման հետ կապված խնդիրները, առաջացող հարցերը օպերատիվ լուծելու համար համակարգումը վերցնում են ինձ վրա։ Առաջարկում եմ`

• Նառա Նիկողոսյանին անձամբ ղեկավարել Նոր դպրոցի ճամբարը` Գայանի Սարգսյանին թողնելով լողափի, լողուսուցման պատասխանատուի գործառույթները,
• Զարուհի Առաքելյանին` ճամբարային գործունեության ղեկավարման փորձ ձեռքբերելու համար անձամբ ղեկավարել Դպրոց-պարտեզի ճամբարը, օգնական` Էլինա Սիմոնյան,
• Սյուզի Մարգարյանին` ստանձնել ճամբարային ընդհանուր պարապմունքի համակարգումը։

Ամեն օր իրականացնել ճամբարային ընդհանուր գործունեություն`

• ընդհանուր պարապմուն Մայր դպրոցի մարմարյա սրահում
• պարապմունքներ մարմնամարզական դահլիճում, ավազային վոլեյբոլի դաշտում, մարզասարքերի վրա
• շախմատային մեկանգամյա մրցաշար Կենտրոնում

Պահանջում եմ դպրոցներում ճամբարային գործունեության պարտադիր բովանդակություն համարել.

• «Մեր թաղը» նախագծի իրականացումը կոնկրետ դպրոց-ճամբարի թաղում
• լողը, հեծանիվը
• լողափնյա ուսումնական պարապմունքները
• ինքնասպասարկման աշխատանքները
• ճամբարի հանրայնացումը, ճամբարային խմբագրությունների գործունեությունը։