Մարդու գլխավոր գործի վրա պիտի լինի ուղղվածությունը...

1in.am. Նարե Գրիգորյանի հարցազրույցը կրթահամալիրի տնօրեն Աշոտ Բլեյանի հետ
20.08.2016թ.

Նոր ուսումնական տարվան ընդառաջ որոշ պետական բուհերում հեռակա ուսուցման համակարգում ուսման վարձավճարները բարձրանալու են առնվազն 30-50 հազար դրամի չափով: Անդրադառնալով հարցին, թե կրթական համակարգում ուսման վարձերի թանկացումն արդարացված է, թե ոչ, «Մխիթար Սեբաստացի» կրթահամալիրի տնօրեն Աշոտ Բլեյանն «Առաջին լրատվական»- ի հետ զրույցում նշեց, որ բարձրագույն մասնագիտական համակարգն արատավոր է, այն չի աշխատում հանուն Հայաստանի Հանրապետության:

Աշոտ Բլեյանն անդրադարձավ նաև կրթական ոլորտում առկա մի շարք խնդիրների: Նրա կարծիքով՝ բարձրագույն կրթության ժամանակահատվածը պետք է կարճատև դարձնել. «Խտացրե՛ք ուսման ժամանակը, ինչո՞ւ եք ուզում անպայման 4-5 տարի լինի, այդ ի՞նչ պարազիտիզմ եք ուզում սրսկել առանց այն էլ ծույլ այս հասարակությանը, որ մինչև վերջ թաղված է անգործության մեջ. այս մեր կյանքը դրա արտահայտությունը չէ՞»:

«Մենք ուզում ենք հասարակական կյանքը չփոխել, տնտեսական կյանքը, քաղաքական համակարգը մնա նույնը, բայց նրա մի հարթակ՝ մասնագիտական կրթության հարթակը փոխել, սակայն դա պարզունակ մոտեցում է, որովհետև մեր տնտեսական-հասարակական կյանքի բոլոր արատները կրթական համակարգում արտահայտվում են»,- նկատեց Ա. Բլեյանը:

Ա. Բլեյանի դիտարկմամբ՝ մարդն ընդհանրապես չպետք է մտածեր դիպլոմ ունենալու մասին, պետք է մտածեր մասնագիտական իր պատրաստվածության մասին, որով կարողանար փող վաստակել, իր տաղանդը ներդնել և ստանալ աշխատավարձ, լինել իշխանությունից և ծնողներից անկախ մարդ:

«Խ. Աբովյանի անվան մանկավարժական համալսարանում 4 տարի վճարում և սովորում են, ուսուցչի որակավորում ստանում, հետո ի՞նչ է լինում. դա ողբերգություն է, կարելի՞ է այդ թշվառությունը հանդուրժել և քանի՞ տարի… Հետո գնա, կաշառք տա, որ ընդունվի աշխատանքի, դառնա ստրուկը ինչ-որ տնօրենի և այդ համակարգի, և այդ մարդը պետք է նոր սերո՞ւնդ կրթի: Հետո էլ նախարարի հորդորները՝ նոր ուսումնական տարի է, զերծ մնացեք չարաշահումներից… այդպե՞ս է կառավարվում, խնդիրը շատ ավելի լուրջ է»,- ընդգծեց Ա. Բլեյանը՝ հավելելով, որ անհրաժեշտ է փոփոխություներ իրականցնել:

Մանրամասները՝ տեսանյութում: