Ինքնուսուցում <——> փոխուսուցում = ուսուցում

Ներածություն

Եվ այն ժամանակ, երբ արևը ծագում էր մեր հոգիներից, և այս ժամանակ, երբ արևը ծագում է արևելքից, և եկող ժամանակներում, երբ արևը կլինի սոսկ ֆիզիկական օբյեկտ, գոյատատանման մշտակայուն հարահոսում են յոթ երրորդությունները:

Առաջին երրորդություն

Արարչագործության էությունը կոչվում  է իրականություն: Իրականության էության  իմացության հարատև ձգտումը կոչվում  է կրթություն: Կրթության էության  վերը շպրտված բանաձևումը կոչվում  է ինքնամերկացում:

Երկրորդ երրորդություն

Առանց Ուսուցիչ չկա կրթություն: Առանց  Աշակերտ չկա ուսուցիչ: Առանց Ազգ  չկա աշակերտ:

Երրորդ երրորդություն

Երբ հարցը պատասխան չունի, միակ պատասխանը  ինքնախոստովանությունն է: Երբ հոգիդ  ունկնդիր չունի, միակ ունկնդիրը Արարիչն է: Երբ կրթությունը հաշմանդամ է, միակ բժիշկը ինքնակրթությունն է:

Չորրորդ երրորդություն

Դասարանը գոմ է, եթե այնտեղ հոգաջարդում  է խոսքի դագանակը: Դասարանը տաճար  է, եթե այնտեղ թևածում է Ուսուցչի Խոսքը: Դասարանը աշխատավայր է, եթե այնտեղ ծնվում է գիտելիք-հմտություն-գործ եռամիասնությունը:

Հինգերորդ երրորդություն

Կա մեդիա, կա կրթություն: Չկա բովանդակություն, չկա կրթություն: Կա դասավանդող-սովորող  համագործակցություն, կա կրթություն:

Վեցերորդ երրորդություն

Տիեզերքի կենտրոնը Արարիչն է: Մարդու կենտրոնը հոգին է: Դպրոցի կենտրոնը Սերն է:

Յոթերորդ երրորդություն

Մարդը կա, քանի նրան հիշում են: Գործը  կա, քանի վայելում են նրա պտուղները: Դպրոցը կա, քանի ուսուցիչը սովորում է:

Վերջաբան

Երբ մարդու քունը տանում է, նա փակում է աչքերը: Թեկուզ մի ակնթարթ մի´  փակեք ձեր Հոգու աչքերը:

Հեղինակեց Աշոտ Տիգրանյանը