Արցախի դպրոցների դասվարների վերապատրաստման շրջանակներում նարկայացվում է նաև «Ուրախ օտար լեզու» ծրագիրը: Առաջին օրը ներկայացվեց բանավոր օտար լեզուն կրտսեր դպրոցում՝ կրթահամալիրի ստեղծած նյութերի և ուսումնական կայքերի միջոցով, իսկ այսօր՝ Smart notebook ծրագիրը՝ օտար լեզվի դասավանդման միջոց: Կարևորվեց դասվարի և օտար լեզվի մասնագետի համագործակցությունը:
Այսօր վերապատրաստումից հետո ուղևորվեցինք դեպի Շուշի: Այցելեցինք սուրբ Ղազանչեցոց եկեղեցի ու վերջապես մեզ բախտ վիճակվեց լինել եկեղեցու խորանի տակ գտնվող առեղծվածային սրահում:Ունեցանք աննկարագրելի ու շշմելու զգացողություններ, երգեցինք, աղոթեցինք ու ըմբոշխնեցինք եկեղեցու ողջ վեհությունն ու խաղաղությունը:
«Նեթբուքն ինձ դասընկեր» ծրագրի մեկնարկը կարելի է համարել հաջողված: Ծանոթությունից հետո իսկույն անցանք գործնական աշխատանքին: Ստեղծեցինք մեր էլեկտրոնային այբբենարանի առաջին էջերը, մի քիչ պարեցինք, մասնակիցները հասցրեցին իրենց մեկնաբանությունները գրել կարծիքներ բաժնում:
«Նոթբուքն ինձ դասընկեր» ծրագրով վերապատրաստումներն ընթանում են Ստեփանակերտի թիվ 2 դպրոցում: «Անունների պատմություն» մեթոդով ծանոթացանք, ներկայացրինք ծրագիրը: Սկսեցինք ստեղծել մեր անհատական էլեկտրոնային այբբենարանները, պատմեցինք մեր փորձի մասին: Աշխատանքի ընթացքում մթնոլորտը գնալով ավելի ջերմացավ, մտավախություններն ու անհանգստությունները տեղի տվեցին աշխատանքային հրճվանքին
Քանի որ մեզնից սպասում եք մանրամասն հաշվետվություն, ապա ես որոշեցի ինձ վրա վերցնել այդ ծանր գործը ու կներկայացնեմ այն, ճիշտ է, առանց նկարների, բայց՝ սիրով: Ուրեմն այսպես.
Աշնանային բնանկարների ցուցահանդեսների միջով հասանք Ստեփանակերտ: Արդեն տեղավորվել ենք իր անվանը համապատասխանող «Հեղնար» հյուրանոցում: Հ.2 դպրոցը հյուրանոցի հարևանությամբ է: Պատրաստվում ենք վաղվա սեմինարին:
